October 9, Thawhtanni khan Chhingchhip Bial te chuan District Office sak meka hnatlan nan cheng singkhat an hlan. Hunserh tawi District Office-ah hman niin Rev. R. Laltlankima, Chhingchhip Bialtu Pastor chuan kaihruaiin “Chhingchhip Bial mipui te chuan District Office sak mek-ah hian hnatlan ve an chak hle a, amaherawhchu an tan a taka kut thlaka hnatlan chu thil harsa a nih avangin Bial Board meeting chuan Bial mipuite kan hnatlan vek theihna tur ngaihtuah in District Office sak mekah hian sum leh pai hmangin hnatlan mai ni se alo tih angin kan rawn hnatlang ve ta a ni” tiin District Office staff ten an lo dawnsawn danah lawmthu a sawi a ni. Chhingchhip Bial Hruaitute hi Rev Biaksangzuala, District Secretary leh Office staff te chuan lo dawng sawngin Rev Biaksangzuala chuan Chhingchhip Bial ten District Office sak mek-ah hnatlan duhna thinlung an nei chu lawmawm a tih thu sawiin Bial dangte entawn tlak an nih thu a sawi a, tawngtaina a nei bawk a ni. Chhingchhip Bial Treasurer Upa Lalhmuakliana pawhin District Office a an hnatlang ve thei chu lawmawm tiin District Secretary kutah an hnatlanna hi a hlan a ni. Chhingchhip Bial atang hian Bialtu Pastor, Bial Treasurer bakah Bial Secretary Evan H.Lalngaihzuala pawhin a telpui bawk a ni. Chhingchhip Bial te hian November 8, 2016 khan Bial chhunga Kum Upa te pualin District Office hi an lo tlawh tawh bawk a, hetah pawh hian District Office a dah turin thilpek an lo hlan tawh bawk a ni.
2017-10-13
Facebook