September 11 Pathianni hmang khan Aizawl East District chung a Pastor Bial 30 leh North Mizoram District chhunga pastor Bial 28 te chuan a rualin Bial Sunday School Conference an nei a. Bial Conference ah hian Thu inchhang, Bible chang insawi siakna, Group zai, Solo leh Recitation hmang te a inelna buatsaih a ni. Bial thenkhat erawh chuan inelna nei lovin Pathian Thu a chakna tur leh hriatna lama puitu a nih theih nan Pathain Thu zirna neih tlan a ni bawk.
General Sunday School Director Rev. R. Laichhingpuia leh Aizawl East District Sunday School Director Rev. Lalchhanhima te chuan Sakawrdai Bial chhunga New Vervek khuaa neih chu an hmanpui a. General Sunday School Secretary Rev. R. Vanlalawia chuan Kolasib Venglai Bial Conference leh Jubilee lawmna a hmanpui. Tin, Aizawl East District Sunday School Secretary Evan. Hr Lalrindika leh Treasurer Upa Rodailova Zote te chuan Kawlkulh Bial Conference Kawlkulh Vengthar Kohhran- a neih chu an hmanpui. N. Mizoram District Sunday School Director Rev. Lalramzauva Sailo chuan Thenzawl Bial Conference a hmanpui a, Secretary Evan. H. Lalrinngheta chuan Maubawk Bialah a hmanpui bawk.
Sunday School kumpuan “Thlarau Thianghlim Naupangte tan” tih chu hman niin he Conference pual hian naupangte tana Thlarau Thianghlim dil sak in bial engemawzah ah hlawhtlinna hmu in Naupang Thlarau Thianghlim la dawng ngai lo ten an dawng thar.
Bial Sunday School khawmpuiah hian an rorel passed tam tak zingah Naupang ten Thlarau Thianghlim siamtharna an chan theih nan Crusade leh Camping buatsaih sak tura thu passed a tam hle a ni.
He Bial Sunday School khawmpui hi Dimapur Missions Field atangin mi 7 ten Aizawl khawpui chhung bial hrang hrangah an hmanpui a, bial thenkhat chuan an kalna senso leh Sunday School chungchanga thil pawimawh tur bakah leh an mahni pual present te an lo hlan bawk. Dimapur atanga rawn hmanpuitu pakhat phei chu a hna thawhna School-a an Principal chuan a hna a kal loh ni apiang in Rs. 150/- a hlawh atanga cut sak turin a ti hial a ni. Miten Lalpa rawngbawlna atana ther hlo an neih belh chu sawi loh an chan ngam te hi ava han ropui danglam em.
Facebook