October 27 atanga 29 chhunga Serchhip Bial, Serchhip Biak Inpui hmuna District Missions Inkhawmpui hman tur atan inbuatsaihna chak taka kal chhoh mek zel a ni.
Kumin District Missions Conference-ah hian Thupui-ah “I puanin hmun chu zauh rawh” Isaia 54:2 hman tur niin Rev Darchhawna, Missions Director; Rev Biaksangzuala, District Secretary; Evan Pc.Lalrokima, General Missions Treasurer bakah Pastor PB Chawngtinliana, Arunachal Field Director leh Rev H.Vanlalchhana, Upper Republic Bialtu Pastor te thusawi rawngbawlna nei tura ruat an ni. District Missions Treasurer, Evan Lalthuthlunga chuan inkhawmpui neihna hmun tur enpui turin Vawiin Inrinni (Oct 7) khan Serchhip hi panin Pathianni thleng hun a hmang dawn a ni.
———
September 22 atanga 24 chhung khan Aizawl East District hnuaia Bial hrang hrangte chuan Bial Missions Inkhawmpui hlim takin an hmang.
He Inkhawmpui hi Bial thenkhat chuan September 23, Inrinni rorel inkhawm atang khan hmang tanin Inrinni zan atang khan Revival Inkhawm in hun an hmang hlawm a ni. Inrinni nilengin Bial chhung inawpna leh District-a lut tur ngaihtuahin rorel inkhawm neih a ni.
District Missions Department leh District Kohhranpui hruaituten hetiang hian an hmanpui :
Rev Darchhawna, District Missions Director – Rabung Bial-ah
District Missions Secretary Rev R.Lianzama – Zemabawk Bial-ah
District Missions Treasurer Evan Lalthuthlunga – Darlawn Bial ah
Rev Rosanga Kawlni, Superintendent chuan Serchhip Bial-ah
Rev Biaksangzuala, District Secretary – Kawlkulh Bial-ah
Rev Vanlalfela Ramtiam, District Treasurer – Khawruhlian Bial-ah
——-
Chhingchhip Bial Sunday School Kumpuan Committee hmalakna-in September 30, Inrinni zan atanga Pathianni zan thleng khan Chhiahtlang Joint Church; Chhiahtlang Vengpui, Chhiahtlang Chhimveng leh Chhiahtlang Hmarveng huam chhunga Naupang Sunday School te tan Chhiahtlang Hmarveng Biak In-ah Láng Camp hlawhtling taka neih a ni.
He camping-ah hian Speaker-ah Bialtu Pastor, Rev Laltlankima chu hman a ni a, Inkhawm apiangin Naupang Thlarau Thianghlim Baptisma la chang lo te pualin tawngtaisakna neih thin a ni. Pathian Thlarau Thianghlim awmpuina hnuaiah hlim taka hman a ni a, Thlarau Thianghlim dawng thar mi 29 lai an awm. Bial Sunday School Kumpuan buatsaih hian Naupang pual Láng Camp thawh hnihna hi October 7 leh 8 hian Chhingchhip Hqrs. leh Chhingchhip Mualpui Naupang te tan buatsaih leh a ni bawk.
———–
Social Work Day hlawhtling taka hman a ni:
October 2, Thawhtanni khan North East India PYD Social Work Day a nih angin Aizawl East District chhunga Aizawl Khawpui pawn Bial hrang hrangte chuan he ni-ah hian Vantlang tana thil tha tiin Social Work Day hi hlawhtling takin an hmang hlawm a ni. Bial hrang hrang te hman dan Report kan hmuh leh kan hriattheih lo tarlang ila:
Serchhip Bial te chuan Social Work Day kha Bial huapa hmangin Zingkarah New Serchhip College peng atanga Serchhip Bazar thlengin khawlai dung thenfai an thawk a, member 80 vel an thawkchhuak a ni. College Peng-ah hian hunserh tawi Upa Vanlalmana, Bial Kohhranpui Treasurer chuan hmangin Serchhip Bazar-ah Evan Lalthankima Ralte, Bial Kohhranpui Secretary chuan tawngtaiin Social Work Day kharna hun hi a hmang thung a ni.
Darlawn Bial te chuan Bial huapin Social Work Day hi an hmang a, Bialtu Pastor Rev.T.Lalbiakliana’n hawnna a nei a ni. He hunah hian Member engemaw zat thawkchhuakin Darlawn khawlai dung thenfai hna an thawk a, tlai lamah intihhlimna hun an hmang nghal a, Zan-ah Darlawn Biak In-ah Fellowship programme hman chhunzawm niin Evan.Ngurzikpuia, Bial Kohhranpui Secretary hnen atangin fuihna thu tha tak ngaihthlak a ni a, Local hrang hrang atangin Item hmuhnawm tak tak leh hlimawm tak tak entir leh ngaihthlak a ni bawk.
Kawlkulh Bial te chuan Social Work Day hi Bial huapa hmang lovin mahni Tualchhung theuh-ah a rem chan dan anga hman ni se an tih angin Bial Headquarter, Vengthar PYD te chuan khawlai dung thenfai hna an thawk a, Venglai PYD ten an veng chhung khawlai dung tifaiin Social Work Day hi an hmang bawk a ni.
Khawlian Bial, Khawlian PYD te chuan Social Work Day kha hlim taka hmangin khawchhung tui tlan berm Khurpui leh Side Drain tifaiin hun an hmang a, member engemaw zat an thawkchhuak thei a ni. Khawlian Local te hian tunah hian Biak In sak hna an thawk mek a, Ceiling siam zawh tawh niin kumin chhunga luah hman turin nasa takin Kohhran mipui ten tan an la mek a ni.
Chhingchhip Bial te chuan Social Work Day kha Bial huapa hmang lovin Tualchhung PYD te mahni remchan angin hlim takin an hmang hlawm a, Chhiahtlang Hmar Veng PYD te chuan zing karah Chhiahtlang khaw tawpa zin mite tawngtaina hmun tifaiin hnatlang an nei a, he hun hi Rev R.Lalrlankima, District PYD President chuan a telpui a ni. Thentlang Local te pawhin zingkarah hun hmangin khawchhung inkalpawhna kawng dung thenfai hna an thawk a, Chhingchhip Hqrs. PYD te chuan Chhingchhip Mizoram Rural Bank-a dawr tute thutna turin Thutthleng an pe bawk a ni.
E.Lungdar Bial te pawhin Bial huapa hmang lovin Tualchhung PYD ten an mahni remchan angin an hmang hlawm a, E.Lungdar Local te chuan zing karah vantlang zunin tihfai hna an thawk a, Leng Local te chuan vantlang hnawm hnawk leh a tul tul an thawk bawk a ni.
Hnahlan Bial-a Hnahlan khawchhung PYD te chuan Social Work Day khan Tourist Lodge leh a chhehvel tihfai hna thawkin member engemaw zat an thawkchhuak thei a, Tourist Lodge kawng sir vela PYD thing phu-ah chhinchhiah an tar nghal bawk a ni.
Serchhip Dinthar Bial Ramthar Local te chuan Social work Day-ah Vengchhung Thlanmual tifaiin hun an hmang a, member thawk chhuak an tha hle ani. Hriatlang Local te chuan khawchhung Step tifaiin member 20 vel an thawkchhuak bawk a ni.
Khawruhlian Bial te chuan Bial huapa hmangin Khawruhlian Primary Health Centre (PHC) tihfai hna an thawk a, member 30 chuang an thawkchhuak thei a, hlim takin Social Work Day kha an hmang a ni.
Khawzawl Bial te chuan Social Work Day kha Aizawl Road Tuisen phai kawng chhia siamin hnatlang an nei a, member engemaw zat an thawkchhuak thei a ni.
Champhai Bial leh Champhai Bethel Bial te chuan Champhai Joint PYD huaihawtin Social Work Day hi an hmang a, hetah hian CHANEM building leh a chhehvel hnawk thenfai hna an thawk a, member 70 vel an thawkchhuak thei a ni. Hemi zan hian Champhai Bial Hqrs. Biak In-ah Joint Fellowship neih nghal a ni a, Pastor C.Lalmalsawma, Khawbung Bialtu Pastor leh Thlamuantu Committee Chairman ni bawk chuan Thlamuantu Campaign a nei nghal bawk a ni.
Rabung Bial te chuan Social Work Day kha Bial huapa hmang lovin Tualchhung PYD ten mahni remchan angin an hmang hlawm a, Rabung PYD te chuan zingkarah thlanmual tihfai hna an thawk a, Hliappui PYD ten zingkarah bawk khawlai tifaiin hun an hmang a, khawlai an tihfai zawhah Biak In leh a vel tifaiin hun an hmang chhunzawm leh a ni. Murlen PYD te chuan nilengin khawlai tifaiin hun an hmang a, member 30 chuang an thawkchhuak thei a ni. Khualen PYD te pawhin zingkarah khawlai dung bawlhhlawh chharin an phiat fai a, PYD mai ni lovin Sunday School naupangte pawh an hnatlang a ni.
Saitual Bial N.Lungpher Local te chuan nilengin khaw chhung thenfai hna an thawk a ni.
North Vanlaiphai Bial chhunga Tualchhung PYD te pawhin mahni remchan angin an hmang a, North Vanlaiphai khawchhungah chuan Joint PYD bultumin hman a ni a, hetah hian hunserh T.Upa Lalhmachhuana Hnamte, N.Vanlaiphai Bial Treasurer chuan hmangin hemi hnu hian khaw chhunga tuihawk luankawr tha lo siamthain, Rawlkhang Local Biak In bul an sam fai bakah N.Vanlaiphai khaw chhunga bawlhhlawh te an chhar fai leh bawk a ni. He hunah hian PYD member thahnem tak an thawkchhuak a ni. Khawlailung PYD te chuan zingkarah Khawlailung Dinthar Branch YMA Library Building leh a bul tih fai hna thawkin Lungkawlh PYD te chuan khaw chhunga vantlang zunin an thenfai bakah khawlai bawlhhlawh an chhar fai a, PYD member engawmzat an thawkchhuak thei a ni.
——-
October 7, Inrinni hian Bro. Lalrammawia te chhungkua, Lungkawlh Local, N.Vanlaiphai Bial te chuan Pathian hnena lawmthu sawi chawimawina an nei dawn a. Lungkawlh-ah hian a zawnin chawimawina vawi 15 a awm tawh a ni.
——-
October 4, Nilai zan atang khan Thuampui Bial, Muanna Veng-ah Revival Crsuade neih mek niin he hunah hian Crusaders for Christ Team te chuan rawngbawlna neiin Speaker-ah Evan H.Lalhlimpuia hman a ni. Oct 7, Inrinni hian Upa Lalchhuanga te chhung chuan Pathian hnena lawmthusawi chawimawina an nei ang.
——-
September 22 atanga October 1 chhung khan Bawngkawn Church Board Committee te hmalakna in Bawngkawn Biak In-ah Revival Crusade hlawhtling taka hman niin Speaker-ah Rev R.Sangthanga an hmang.
——–
Chhiahtlang Vengpui LAD te chuan October 3, Thawhleh zan atang khan Home Crusade an nei mek a, LAD Member awmna In-ah Crusade hi neih thin niin tanna hun leh inkhawm kaihhruai hna LAD hruaituten thawkin Speaker-ah T.Upa H.Vanlalsanglura chu an hmang a ni.
———
October 1, Pathianni khan Khawzawl Bial PYD buatsaihin Khawzawl hmunah Bial huap Rally hlim taka neih a ni.
Speaker-ah Evan H.Vanlalhruaia chu hman niin mi 9 in sual ngaihdamna baptisma an chang. Ngopa-ah pawh Pathianni vek khan Puitling pakhatin sual ngaihdamna baptisma chang. Champhai kohhranah Puitling pathum in sual ngaihdamna baptisma hi an chang bawk. Evan Lalchhuanmawia Zote leh a thiante rawngbawlna, Bawngkawn Bial Ramhlun Sport Complex-ah pawh Pathianni khan mi 2 in sual ngaihdamna baptisma hi an chang.
——–
Rev Rosanga Kawlni, District Superintendent leh Rev Vanlalfela Ramtiam, District Treasurer te chuan October 6 atanga 8 chhunga Lawngtlai hmuna General LAD Conference hman mek-ah telpuiin Rev Rosanga Kawlni, District Superintendent hian Pathianni Chawhnu Inkhawm-ah thusawi rawngbawlna a nei dawn a ni.
Rev F.Lalchhanhima, District Sunday School Director chuan Darlawn Bial Sunday School Department buatsaiha Bial huap Naupang pual Lang Camp Ratu hmuna Vawiin Inrinni atanga Pathianni thlenga neih turah Speaker-ah tangin rawngbawlna a nei.
——-
Aizawl East District PYD hruaitute chuan an rorel bawhzuiin fehchhuah programme an hmang tan dawn. A thawhkhatna atan October 9, Thawhtan Zan hian Zemabawk Bial tlawhin Zemabawk Biak Inah hun an hmang dawn a. Rev R.Laltlankima, District PYD President chuan thusawi rawngbawlna a nei ang. Kumin chhung hian Aizawl khawpui chhunga Bial hrang hrangte chu tlawhchhuah hman an tum a, a talh tawl in Bial hrang hrang-ah rawngbawlna an kalpui dawn a ni.
——-
October 11, Nilaini hian Aizawl East District Literature Committee chu District Office-ah neih a ni dawn a, he hunah hian Kum 2018 Nilai zan thupui bakah thil tul dangte an ngaihtuah dawn a ni. Aizawl East District te hian Kum 2018 Nilai zan thupui-ah “Kohhran Dik- Ringtute himna” tih Evan Lalhmangaiha Chawngthu, Serchhip ziak chu zir ho tura buatsaih mek a ni.
Facebook