REVIVAL SPEAKER PUALIN RETREAT :
April 21, Zirtawpni khan District Committee, Ramhlun South-ah Aizawl East District chhunga Revival Speaker te tan Retreat neih a ni.
Rev H.Vanlalchhana, District Revival Committee Chairman chuan kaihruaiin Revival Speaker te chu an rawngbawlna-ah Pathian hre reng chunga kal turin fuihna thu sawiin tawngtaina a nei a, Evan Lalhmachhuana, Secretary report pein a Report atanga a lan dan chuan Aizawl East District chhungah Revival Speaker 8 awm mekin, chungte chu: Evan Lalchhuanmawia Zote, Thuthlung phurtute Team; Evan Malsawmdawngliana, Ebenezar Revival Team; Evan Malsawmthanga, Oneness Revival Team; Evan H.Lalremhlua, Rinna Thutak Kengtu Team; Evan H.Lalhlimpuia, Crusaders for Christ Team; Evan C.Laltanpuia, Pentecostal Revival Team leh Evan B.Lalruatmawia, Krista Thuhretute Team bakah Evan Hmingchungnunga, Krista tana Sengkhawm tute Team te niin Kum 2016 chhung khan Bial 16-a khaw 25-ah rawngbawlna an kalpui a. An rawngbawlna kaltlangin Thlarau Thianghlim mi 123 in dawng tharin Sual ngaihdamna Baptisma mi 43 in an chang a, taksa damna chang mi 23 an awm. Tin, Kohhran-ah mi engemaw zat sengluh an ni bawk.
District Revival Speaker te puala Retreat neih-ah hian Thupui hlawm hrang hrang siamin hetiangin zirtirna pek an ni :
“Thianghlimna chungchang” – Rev Rosanga Kawlni, District Superintendent
“Administration” – Rev Biaksangzuala, District Secretary
“Financial” – Rev Vanlalfela Ramtiam, District Treasurer
“Missions chungchang” – Rev Darchhawna, District Missions Director
“Thlarau Thianghlim” – Rev F.Lalchhanhima, District Sunday School Director
He hunah hian sawihona hun tha tak neih chhunzawm a ni bawk.
—————-
DISTRICT PYD :
April 27, Ninga Zan khan District Office-ah District PYD Executive Committee neih a ni a. District Conference, Khawlian hmuna hman zawh tak thlir letna leh Daido hmuna rawngbawlna kalpui zel dan tur bakah Zokhawthar hmuna District PYD ram chungchang te an ngaihtuah a ni.
—————–
UPPER REP. BIAL MISSIONS DEPTT :
Upper Republic Bial Missions Department chuan Pathianni kalta April 23, khan Falkawn Hospital tan thutthleng 10 an hlan. Heng thutthleng te hi TB Hospital ah 5 leh Casualty ah 5 niin a hmunah an dah nghal a ni.
—————–
BIAL SPORT :
Bawngkawn Bial Sunday School buatsaihin April 22, Inrinni khan Bial huapa Sport hlawhtling takin neih a ni.
He hun hi Bawngkawn Brigade Field-ah hman niin Upa HK Lalnunsanga, Bial Sunday School Director chuan hawnna leh Pathian hnena hlanna a nei a. Bial Sunday School Sport-ah hian Item chi hrang hrang hmanga intihhlimna hun neih niin Bial chhung atangin Naupang mai bakah Zirtirtu mi 100 vel an kal. Naupang ten nuam an tiin an hlim hle a, Chawhnu Dar 1 vel khan hun an titawp ta a ni.
Bazar Bial PYD te pawhin Chite Field-ah April 22, Inrinni khan Bial huapin Sport an nei a, infiamna hrang hrang hmanga intihhlimna an nei.
Local paruk te atangin thalai member 250 vel an kal a, Evan Lalchhuanmawia Zote, Dist PYD Vice President chuan hmanpuiin hawnna a nei. Fuihna thu sawiin Sport ah chauh PYD member nilo, engkim a PYD ngam nih a pawimawh” thu a sawi a ni. Thuampui Bial PYD te pawhin vawiin April 29, Inrinni khan Zuangtui Community Hall-ah Bial huapin Sport an nei bawk.
——————–
CAREER GUIDANCE :
Serchhip Bial PYD Education Sub Committee te hmalakna in April 23, Pathiann chawhnu khan College Veng Kohhran Naupang te tan Career Guidance hlawhtling taka neih a ni.
Resource person atana hman Sis Ruth Lalhmingmawii leh Sis Lalbiaktluangi ten zirtirna pein zirlai naupang te an zirna kawng inkoh hmuhna hun an hman bakah quiz te buatsaihin hun hlimawm tak an hmang.
—————
BIAL SS CONF :
Ngopa Bial leh Khawruhlian Bial te chuan April 23, Pathianni hmang khan Bial Sunday School Conference hlim takin an hmang.
Bial Sunday School Conference hi District atangin September thlaah a ruala neih tura tih ni mahse heng Bial pahnih te hian remchan zawkna avangin an hmang hma a ni.
Ngopa Bial te chuan April 21, Zirtawp Zan atang khan Ngopa Hqrs. Kohhran-ah an hmang a, Bialtu Pastor R.Malsawma’n hawngin Pathian hnenah a hlan. Bial Sunday School Conference-ah hian Naupang Sunday School ten Thu leh Hla, Solo leh Recitation hmangin intihsiakna an neih bakah Bialtu Pastor R.Malsawma leh Evan V.Lalngilneia te hnen atangin thusawi ngaihthlak thin a ni bawk. April 22, Inrinni nileng khan Conference rorel neiin kum 2018 Conference chu Ngopa Hqrs.-ah bawk an nei leh dawn a, Bial chhung Local tin ah Naupang pual camping neih tura tih niin Bial chhung sunday school zirtirtute tan seminer neih leh Kum 2018 ah chuan Puitling sunday school tan intihsiakna neih ve tawh nise tihte chu an thu passed langsar zualte a ni.
Khawruhlian Bial te chuan April 22, Inrinni atang khan Bial Sunday School Conference hi hlim takin an hmang a, solo, recitation, thu inchhang, Pathin thu leh solfa hla hmangte a in tihsiakna an nei a ni.
——————
INTLAWH TAWN PROG :
April 29 atang 30 chhung hian Serchhip Bial PYD leh North Mizoram District, Tlangnuam Bial PYD te chuan intlawh tawn Programme an hmang mek.
April 29, Inrinni zan atanga hman tan niin Serchhip Bial Hqrs. Biak Inpui-ah Serchhip Bial te hian an thleng a. April 29 atangin Inkhawma hun hman nghal a ni dawn a, Inkhawm banah fellowship neih chhunzawm a ni ang. He programme hmang tur hian Serchhip Bial lam pawh nasa takin an lo inbuatsaih a, Tlangnuam Bial PYD te hi an bialtu Pastor, Rev. K. Malsawmtluanga’n a ho a ni.
Bethlehem Bial leh Bazar Bial te pawhin Intlawh tawn Programme April 30, Pathianni hmang hian an nei dawn a, Bazar Bial te hian Armed Veng Kohhran-ah lo thlen an tum a, Pathianni Chawhnu leh zan ah program siam niin Pathianni chawhnu inkhawm banah Joint fellowship an nei ang.
Tin, Hnahlan Bial te pawhin Bial Conference rorel bawhzuiin Bial chhunga Tualchhung Kohhran hrang hrangte chuan in tlawh tawn programme an kalpui mek a, an hun hman tawhna-ah hlawk thlak an ti hle ni. Bial PYD te pawh in tlawh tawnna neih chhoh mek niin Bialtu Pastor pawhin Bial fan programme kalpui mek bawk
———————
LAWMTHUSAWI CHAWIMAWINA :
April 14, Good Friday hmanna kal zelah Ramthar Local te chuan Evan R.Vanchhunga Speaker-a hmangin Revival Crusade April 17 atanga 24 thleng khan hlawhtling takin an nei a, April 23 leh 24 khan lawmthusawi chawimawina neih a ni a, Kohhran hoten Pathian Thlarau Thianghlim awmpuina hnuaiah hlim takin hun an hmang a ni.
Thuampui Bial, Zuangtui Local-ah pawh April 22, Inrinni khan Upa K.Remruata te chhungkua kaltlangin lawmthusawi chawimawina hi neih a ni bawk a, Sis Lalhmangaihzuali B/W, Maubawk chu Speaker atan hman a ni a Kohhran hoten hlim takin hun an hmang a ni.
—————–
SEMINAR :
April 22, Inrinni khan E.Lungdar Bial te chuan Bial huapin Leng Biak In-ah Administration tih thupuia hmangin Seminar hlawhtling takin an nei. He hunah hian Resource Person atan Rev Lalmalsawma Sailo, General Superintendent chu hman niin Church Board Committee chin te chu tel vek tura tih an nih angin kal an tha hle. Chawhma lamah Paper zir hona neih a nih hnuah Chawhnu lamah sawi hona hun tha tak neih chhunzawm a ni a, kalkhawm ten hlawkthlak an ti hle a ni. General Superintendent Rev Lalmalsawma Sailo hian E.Lungdar Bial chhungah rawngbawlna nei nghal in Kohhran tinte tlawhchhuahna hun a hmang nghal a ni.
——————-
BIAK IN SA :
Rabung Bial, Pamchung Kohhran te chuan Biak In sak hna an thawhchho mek a, April 24, Thawhtanni khan Biak In chhuat tur laih hnatlang an nei a, Bial LAD te pawhin hnatlangin Biak In sak hna hi an chhunzawm mek zel a ni. Tunah hian Pamchung-ah hian Kohhran member 31 awm mekin Evan Laltlanmawia chuan rawngbawlna a kalpui mek a ni.
———————
BIAL PYD SPORT :
Zemabawk Bial PYD te buatsaihin April 22, Inrinni khan Zemabawk North Playgdround-ah Sport hlimawm taka neih a ni.
He hunah hian Item chi hrang hrang hmangin intihhlimna hun hman niin Zemabawk Bial chhunga Tualchhung PYD dinna Local hrang hrangte an telkim thei a ni. Zemabawk Bial PYD Sport-ah hian Lungbial Local PYD te chu pakhatna an ni.
———————–
MEMBER THAR TLAWHCHHUAHNA:
Zemabawk Local LAD te chuan April 18, Thawhleh Zan khan LAD member tharte tlawhchhuahna Programme hlimawm tak an hmang. He tlawhchhuah Programme-ah hian Group hnih-ah inthenin Chhungkaw 6 an tlawhchhuak tawh.
Bialtu Pastor thar, Rev R.Lianzama pawhin Bial chhunga Tualchhung Kohhran hrang hrangte tlawhchhuah programme hi a hmang mek bawk a, Zemabawk Bial chhunga rawngbawl tura rawih mek Evan J.Lalhmingsanga pawh May leh June thla chhung awm leh tura tih a ni bawk.
————————
Hruaitute Programme:
Rev Rosanga Kawlni, District Superintendent chuan Pathianni hian District Hqrs. Kohhran-ah hun a hmang ang.
Rev Biaksangzuala, District Secretary chuan North Vanlaiphai Bial chhunga Tualchhung Kohhran hrang hrangah Missionary Support zawngin rawngbawlna a nei ang.
Rev Darchhawna, District Missions Director chuan Pathianni hian Bethlehem Bial chhungah Missionary Support zawngin rawngbawlna a nei anga, Pathianni Chawhma-ah Bethlehem Kohhran-ah neiin Zan-ah Bethlehem Vengthlang-ah rawngbawlna a nei leh ang.
Facebook