September 1, Ninga Zan khan Aizawl East District LAD Executive Committee chu District Office-ah neih a ni a, President Sis F.Lalawmpuii, B/W chuan kaihruaiin neih a ni a, kumin September 30 atanga October 2 chhunga Keifang Playground-a District LAD Khawmpui hman tur Programme siam leh khawmpui atana inbuatsaihna chi hrang hrang an ngaihtuah a, an thu passed langsar zingah –
1. Kumin 2016 District LAD Conference hman turah palai a tam thei ang ber kal tura ngenna Bial tinah lehkha thawnin Motor a tam thei ang ber hmang tura inngen nawn leh ni se tih a ni a, Conference hmanpui turin heng mite hi sawm ni se : Tripura District LAD Hruaitute, Aizawl East District chhunga Department tin O.B te leh Bialtu Pastor zawng zawng leh Local tin LAD te
2. District LAD ten Home Missionary rawihna tur atan sum chhunluh hmangin Home Missionary rawih ni se, chungte chu: Evan Lalduhawmsanga, Kawlkulh Bial Dulte-ah, September leh October thla chhung atan; Evan T. Vanlalvuana, Champhai Bethel Bial Hruaikawnah, September thla chhung atan.
3. District LAD OB ten Pastor Bial 30 awm mek chu Bial inchan semin, mi pakhatin Bial 5 theuh changin siam rem nghal a ni bawk.
4. District LAD Manual chu District LAD Conference hman turah release tura tih a ni a, Release turin Rev F. Lalchhanhima, District Sunday School Director chu ruat a ni.
District LAD Executive Committee hian Kumin District LAD Conference hian Main Speaker nei lovin Sis Lalramthangi, General LAD Secretary; Sis Zionparmawii, District LAD Secretary; Rev Rosanga Kawlni, District Superintendent; Upa JH Rozawna leh Rev. KVL Hmangaihkima, Khawruhlian Bialtu Pastor te hnen atangin Thupui thensawm hmangin Thuchah an sawi thin ang.
District LAD Inkhawmpui na tur Pandal sak hna pawh thawh chhoh zel a ni a, Pandal Structure hi September 2, Zirtawpni khan Keifang phurh thlen tawh a ni. Keifang leh Saitual Bial chhunga Tualchhung Kohhran hrang hrang ten a ni inchhawkin Pandal sak hna hi an thawk thin a, Ft 60 X 105-a liana, mi 2,000 vel leng tura ruahman a ni. Keifang leh Saitual Bial te hian LAD Khawmpui an thlen tur atan hian nasa takin an inbuatsaih a, September 24, Inrinni hian Pandal sak hna hi peihfel turin ruahmanna an siam. September 28-ah Usher leh Receptionist te tan Briefing neih tur a ni a, September 29, Ninga Zan-ah Pandal hlanna Inkhawm, Pandal-ah hian an nei dawn bawk a ni. Kumin LAD Inkhawmpui-ah hian Mikhual hmuah leh sem Keifang khaw chhunga YMA Branch Pathum te kutah dah a ni bawk. Inkhawmpui Thupui-ah “Sim hming pu tlakin rah rawh u“ Matthaia 3:8 tih chu hman a ni ang.
Facebook