September 25, Pathianni hi Khawvel puma UPC kohhran din champha vawi 71 na a ni. He ni hi North East India UPC chuan Missionary Day ah puangin kum tin urhsun taka hman thin a ni.
Kum 1945 Sept. 25 khan United Pentecostal Church hi America ramah Thlarau Thianghlim hnathawh duhawm tak hnuaiah din a ni a, Pentecost harhna hi America ram hmun hrang hrangah nasa taka darhin United Pentecostal Church International hi America ram pumah alo darh ta a ni. He Kohhran hian Lal Isua thuchah Apostol-ten an hrilh thin Chanchin Tha famkim – ‘Lal Isua thihna, phumna leh thawhlehna chanchin tha’ chu thurin bulpuiah neiin khawvel pumah he chanchin tha hi hril darh tura rawngbawlna bul tan nghal niin, chu chuan khawvel hmun hrang hrang chu a kang alh ta duai duai mai a ni.
Tunah hian UPC International hian Ram bung hrang hrang (countries & territories) 220-ah rawngbawlna a kalpui mek a, member pawh maktaduai 5 chuang an awm tawh a ni.
Missionary Day puala NEI huamchhunga kohhran tinte’n Thawhlawm an khawn te General Missions Board in a rel angin District kaltlangin General Missions Department ah thehluh vek tur a ni bawk.
India Hmarchhaka State 6- Mizoram, Assam, Meghalaya, Tripura, Manipur, Nagaland ah te UPC kohhran dinin heng State te hi District 11 ah then sawm leh a ni a. General Headquarters awpna hnuaiah rawngbawlna kalpui mek a ni.
Chanchin tha hrilh rawngbawlna kawnga hmalatu General Missions Department hnuaiah Mizoram pawn Field 7 – Andaman & Nicobar Island, Arunachal, Assam, Bhutan, Dimapur, North Bengal Sikkim leh Odisha Missions Field-ah te Missionary ruaiin kumin chhung ngawt ah pawh hian District leh Field hrang hrang report kan hriat theih chinah mi thar 424 kohhranah sengluh an ni tawh.
Facebook