MADHUBAGAN BIAK IN HAWNG

October 16, Pathianni khan North East India  UPC kohhran thalai pawl PYD hmalaknaa North Bengal and Sikkim Missions field-a Madhubaghan Biak in sak chu Rev. C. Vanlalena, former General PYD President, tuna Lunglei District Treasurer chuan Lalpa Isua hmingin a hawng.
Biak in hawn programme hi Rev. James Lawrence, Field Director chuan a kaihruai a, Field chhung section hrang hrang 9 atangin kohhran member thahnem tak an kal khawm a, Field pawn Bhutan Missions Field atangin thawktu Bro. C.M Chhetri te nupa an tel bawk. Biak In hi kohhran mite leh a mamawhtu apiang te tana tisa leh thlarau lam damna Biak In a nih theihnan Pathian hnenah Rev. C. Vanlalena’n hlanin a hawng a, tlaiah biakin thar lawmna ruai hlim taka kil ho a ni.
Biak In hawn ni hian Baptisma service neih a ni a, Pastor H. Lalropuia, General PYD President kutah mi pathumin Lalpa Isua hmingin Baptisma an chang.
He hun hmang tur hian Pastor H. Lalropuia, General PYD President leh North Mizoram District atangin member 4 an kal. North Bengal and Sikkim Missions Field Director Rev. James Lawrence hovin  Darjeeling, Pakyong leh Gangtok Field te an tlawh kual a, field huamchhung Pardhan More khuaah mi thar 42 Pastor H. Lalropuia’n kohhranah a lawm lut nghal a ni.